VII çağırış Milli Məclisə keçiriləcək seçkilərdə deputatlığa namizəd, Azərbaycan Ağsaqqallar Şurasının sədri, professor Eldar Quliyev 28 saylı Sabunçu üçüncü seçki dairəsindən Bilgəh, Maştağa və Zabrat qəsəbələrinin sakinləri ilə növbəti görüşünü keçirib.
Eldar Quliyevin seçicilərlə bu dəfəki görüşü Bilgəh qəsəbəsində baş tutub.
Deputatlığa namizəd, Azərbaycan Ağsaqqallar Şurasının sədri, professor Eldar Quliyev görüşdə çıxış edərək seçki platformasından, seçicilərin bu günə qədər ona ünvanlanan bütün müraciətlərinə diqqətlə yanaşmasından bəhs edib: “Biz hər zaman seçicinin müraciətləri əsasında işimizi qurmuşuq. Çalışmışıq ki, sizlərin etimadını doğruldaq. Hər bir məsələdə seçicilərin yanında olmuşuq. Ötən dövrdə də fəaliyyətimiz məhz bu prinsiplər üzərində qurulub. Əminik ki, bundan sonra Bilgəh, Maştağa, Zabrat seçiciləri ilə sıx təmaslarımız ümumi işlərimizin faydasına olacaq. Bu gün ölkəmizin hər bir bölgəsində olduğu kimi Bakıətrafı kənd və qəsəbələrdə olan inkişaf, sosial-iqtisadi sahədə həyata keçirilən mühüm işlər, əldə olunan uğurlar göz önündədir. Bütün bunlara ölkəmizdə həyata keçirilən uğurlu daxili-xarici siyasət sayəsində nail olunub. Azərbaycan hazırda öz tarixinin ən qüdrətli dövrünü yaşayır. Ulu Öndər Heydər Əliyevin əsasını qoyduğu müasir Azərbaycan bu gün regional və qlobal miqyasda söz sahibidir. Azərbaycan regionun lider dövlətidir. Cənubi Qafqazda Azərbaycanın mövqeyi və rəyi olmadan heç bir layihə reallaşmır. Ölkəmizin əldə etdiyi uğurlar onun regionda və qlobal miqyasda təhlükəsizlik adası kimi mövqeyini daha da gücləndirib. Ulu Öndər Heydər Əliyev strategiyasının ən layiqli davamçısı, Müzəffər Ali Baş Komandan, Prezident İlham Əliyevin rəhbərliyi ilə Azərbaycan bütün sahələrdə böyük inkişafa, tərəqqiyə nail olub. Azərbaycan artıq mötəbər tədbirlərin keçirildiyi bir məkana çevrilib. Bu amil isə ölkəmizdə mövcud olan ictimai-siyasi sabitlik, inkişafla bağlıdır. Bakıda keçiriləcək COP29 beynəlxalq tədbiri də bu lin noyabrında növbəti dəfə Azərbaycanı bütün dünyanın diqqət mərkəzinə çevirəcək. Sözsüz ki, COP29 kimi vacib və mötəbər bir tədbirin Azərbaycanda keçirilməsi ölkəmizin son dövrlərdə əldə etdiyi uğurlarla yanaşı cənab Prezident İlham Əliyevin nüfuzunun göstəricisi hesab edilir”.
Eldar Quliyev 44 günlük Vətən müharibəsi və 2023-cü ilin 19-20 sentyabr tarixlərində həyata keçirilən birgünlük antiterror tədbirlərinin nəticəsi olaraq Azərbaycanın dünya birliyi tərəfindən tanınan, qəbul edilən ərazi bütövlüyü və suverenliyinin tam təmin edildiyini söyləyib: “Bu gün xalq olaraq başı dik, alnı açıq, dünyada öz sözü və imzası olan dövlətin təmsilçisi kimi böyük qürur hissi keçiririk. Çünki özümüzə aid olan tarixi torpaqlarımızı milli birlik və xalqımızın əzmi, cənab Ali Baş Komandanın Dəmir Yumruğu ilə geri qaytarmışıq. Artıq bütün torpaqlarımızda şanlı üçrəngli bayrağımız qürurla dalğalanır. Böyük Qayıdış konsepsiyasına uyğun olaraq Qarabağ və Şərqi Zəngəzurda nəhəng layihələr icra edilir. 30 ilə yaxın Ermənistanın işğalı altında barbarlığa məruz qalmış ərazilərimizdə böyük quruculuq, bərpa işləri görülür. Artıq keçmiş məcburi köçkünlərin bir qismi öz ata-baba ocaqlarına dönüb. Dövlətimiz erməni vandallarının 30 il daşı-daş üstə qoymadığı bu ərazilərdə hazırda böyük infrastruktur layihələr həyata keçirir, yeni yaşayış və iş yerləri, məktəblər, baxçalar açır və digər zəruri işlər görür. Bu gün Qarabağ və Şərqi Zəngəzurun mənzərəsi tamamilə dəyişir. Ağıllı şəhər, ağıllı kənd konsepsiyasına uyğun olaraq “yaşıl enerji” layihələri çərçivəsində azad edilmiş ərazilərimizdə vacib layihələr icra olunur”.
Natiq Azərbaycanın sülh tərəfdarı olduğunu, Ermənistana bununla bağlı beynəlxalq prinsiplərə uyğun 5 şərt irəli sürdüyünü bildirib: “Ermənistan konstitusiyasında və qanunvericilik aktlarında Azərbaycana qarşı olan ərazi iddialarını və digər məsələləri həll edib sülh şərtlərinə əməl etməlidir. Rəsmi İrəvan artıq Cənubi Qafqazda yeni bir səhifənin açılması üçün mövqeyini ortaya qoymalıdır”.
Eldar Quliyev ölkəmizin hər yerində olan inkişafın Bakı kəndlərində də müşahidə edildiyini bildirib: “Bakı kəndlərinin həyatında böyük dəyişikliklər, inkişaf var. Bilgəh, Maştağa və Zabrat qəsəbələrinin sakinlərinin sosial-rifah halının daha da yaxşılaşdırılmasına xidmət edən mühüm layihələr icra edilib. Eyni zamanda qarşıda da icrasını gözləyən mühüm işlər mövcuddur. Sözsüz ki, biz bundan sonra da hər bir seçicimizin müraciətinə, hər zaman olduğu kimi, adekvat yanaşacayıq”.
Bilgəh, Maştağa və Zabratdan olan seçicilər də öz növbəsində hər zaman onların yanında olan Azərbaycan Ağsaqqallar Şurasının sədri, professor Eldar Quliyevə təşəkkürlərini bildiriblər. Seçicilər adından çıxış edənlər 1 sentyabr 2024-cü il tarixində keçiriləcək parlament seçkilərində ən layiqli namizəd professor Eldar Quliyevə səs verəcəklərini söyləyiblər.
