30 noyabr 2022-ci il tarixində Nizami Gəncəvi adına Masallı Rayon Mədəniyyət mərkəzində rayon ağsaqqallarının da iştirak etdiyi tədbir keçirilib. Tədbir yunan-roma güləşi üzrə keçmiş SSRİ-nin idman ustası, Azərbaycan Respublikasının Əməkdar məşqçisi olmuş Nadir Yaqub oğlu Agayevin xatirəsinə həsr edilmişdi.
Tədbiri giriş sözü ilə Rayon Gənclər və İdman idarəsinin rəisi Sadiq Cahangirov açaraq bu gün hərtərəfli dövlət qayğısı ilə əhatə olunmuş Azərbaycan gəncliyindən, idmanın əhəmiyyətindən, Nadir Ağayevin gənclərin fiziki sağlamlığının yüksəldilməsində açdığı yoldan və bu yolun hazırda onun tələbələri tərəfindən uğurla davam etdirilməsindən bəhs edib.
Vaxtilə Nadir Agayevin nailiyyətlər qazanmasına dəstək olmuş, rayon komsomol komitəsinin birinci katibi işləmiş, hazırda Masallı Rayon Agsaqqallar Şurasının sədri vəzifəsini daşıyan Ələşrəf Niftiyev öz çıxışında Əməkdar məşqçi ilə bağlı xatirələrini danışıb. Ölkəmizdə gənclərin mənəvi inkişafı, vətənpərvərlik tərbiyəsi istiqamətində görülən işlərdən, onların formalaşması və inkişafı üçün yaradılan şəraitdən söz açıb. Azərbaycan Ağsaqqallar Şurasının şəhər və rayon təşkilatlarının, o cümlədən Masallı Rayon Ağsaqqallar Şurasının gənclərlə bağlı həyata keçirdiyi fəaliyyətdən bəhs edib.
Tədbirdə Nadir Agayevin yetirmələri, Azərbaycan idmanında layiqli yer tutanlar, titullar, fəxri adlar, habelə medallar qazanan idmançılar da çıxış ediblər.
Toplantının sonunda Nadir Agayevdən bəhs edən “Pəhləvanın salnaməsi” filminə baxış keçirilib.
Yekunda tədbirin təşkilatçısı Rayon İdman və Gənclər idarəsi tərəfindən idmanda fərqlənənlərə fəxri fərman və hədiyyələr təqdim edilib.
