Azərbaycan Ağsaqqallar Şurasında akademik Əhliman Əmiraslanovun 75 illik yubileyi ilə əlaqədar tədbir keçirilib

Azərbaycan Ağsaqqallar Şurası sədrinin birinci müavini, Milli Məclisin Səhiyyə Komitəsinin sədri, akademik Əhliman Əmiraslanovun 75 illik yubileyi ilə əlaqədar onun çalışdığı Azərbaycan Ağsaqqallar Şurasında tədbir keçirilib.
Tədbirdə yubilyarla yanaşı, Azərbaycan Ağsaqqallar Şurasının sədri, millət vəkil, professor Eldar Quliyev, Azərbaycan Ağsaqqallar Şurası sədrinin müavinləri – millət vəkili, professor Eldar İbrahimov, Bayram Yusifov, professor Vahid Novruzov, Azərbaycan Ağsaqqallar Şurasının İdarə Heyətinin üzvləri – millət vəkili, akademik Ziyad Səmədzadə, millət vəkili Ağalar Vəliyev, o cümlədən Şuranın Aparat rəhbəri Ramin Həsənli, böyük məsləhətçi-hüquqşünas Kamal Əliyev və başqaları iştirak ediblər.
Görkəmli ictimai-siyasi xadimi, tanınmış alimi yubileyi və Azərbaycan Respublikasının Prezidenti cənab İlham Əliyevin Sərəncamı ilə ölkəmizin ictimai-siyasi həyatında uzunmüddətli səmərəli fəaliyyətinə görə 1-ci dərəcəli “Vətənə xidmətə görə” ordeni ilə təltif olunmağı münasibətilə təbrik edən Azərbaycan Ağsaqqallar Şurasının sədri, millət vəkili, professor Eldar Quliyev vurğulayıb ki, noyabr ayı bizim üçün çox əlamətdar və əziz aydır. Belə ki, bu ayda möhtəşəm Zəfər və Dövlət Bayrağı, həmçinin Konstitusiya və Dirçəliş günlərini qeyd edirik. Əhliman müəllimin ad gününün və bu il də yubileyinin bu aya təsadüf etməsi bizim sevincimizi ikiqat artırır. Eldar Quliyev Əhliman Əmiraslanovun deputatlıq və tibb sahəsindəki səmərəli və zəngin fəaliyyətindən ətrafli bəhs edərək onun müdrik bir ağsaqqal kimi gənclərimizin maarifləndirilməsi, eləcə də vətənpərvərlik ruhunda tərbiyə olunmasında gördüyü işlərdən də söz açıb. Qeyd edib ki, bu böyük alimin, ictimai-siyasi xadimin, cərrah-ankoloqun, tibb elmləri doktorunun, akademikin adı artıq çoxdan hər bir azərbaycanlının qəlbində, beynində bir elm və şəfqət fədaisi rəmzinə çevrilib. Ulu öndər Heydər Əliyev və onun layiqli davamçısı, dövlət başçısı cənab İlham Əliyev tərəfindən Əhliman Əmiraslanovun fəaliyyətinin yüksək dəyərləndirildiyini, akademikin digər mükafatlarla yanaşı “Şöhrət”, “Şərəf” və bu günlərdə 1-ci dərəcəli “Vətənə xidmətə görə” ordenləri ilə təltif edildiyini vurğulayıb. Eldar Quliyev Əhliman Əmiraslanovun həm də gözəl ailə başçısı oduğunu, vətənpərvər, ziyalı övladlar böyütdüyünü qeyd edib.
Daha sonra çıxış edən Azərbaycan Ağsaqqallar Şurası sədrinin müavinləri – millət vəkili, professor Eldar İbrahimov, Bayram Yusifov, professor Vahid Novruzov, Şuranın İdarə Heyətinin üzvü, millət vəkili, akademik Ziyad Səmədzadə Əhliman Əmiraslanovun həmişə olduğu kimi bu gün də nüfuzlu millət vəkili, tibb elminin görkəmli nümayəndəsi, dəyərli bir ağsaqqal kimi nümunəvi fəaliyyəti ilə xalqımıza, dövlətimizə böyük xidmətlər göstərməsindən, cəmiyyətimizin inkişafında, gənclərimizin Vətənə məhəbbət, milli-mənəvi dəyərlərimizə, adət-ənənələrimizə hörmət ruhunda tərbiyə edilməsində və maariflənməsində üzərinə düşən vəzifələri layiqincə yerinə yetirməsindən bəhs ediblər. Vurğulayıblar ki, zəngin elmi, pedaqoji təcrübəyə malik olan, 24 il Azərbaycan Tibb Universitetinin rektoru vəzifəsini uğurla həyata keçirən Əhliman Əmiraslanov xalqımızın milli sərvəti hesab edilən böyük şəxsiyyətlərimizin ən parlaq nümayəndələrindən biridir. Natiqlər Əhliman Əmiraslanovu 75 illik yubileyi və Azərbaycan Respublikasının Prezidenti cənab İlham Əliyevin Sərəncamı ilə ölkəmizin ictimai-siyasi həyatında uzunmüddətli səmərəli fəaliyyətinə görə 1-ci dərəcəli “Vətənə xidmətə görə” ordeni ilə təltif olunmağı münasibətilə ürəkdən təbrik edərək, ona gələcək fəaliyyətində uğurlar arzulayıblar.
Azərbaycan Ağsaqqallar Şurası sədrinin birinci müavini, Milli Məclisin Səhiyyə Komitəsinin sədri, akademik Əhliman Əmiraslanov ona göstərilən diqqətə, xoş sözlərə və gözəl arzulara görə hər kəsə öz təşəkkürünü bildirərək, onun fəaliyyətini yüksək dəyərləndirən Azərbaycan Respublikasının Prezidenti cənab İlham Əliyevə dərin minnətdarlığını ifadə edib. Fəaliyyət göstərdiyi hər bir sahədə Vətənimizin daha da çiçəklənməsi naminə bundan sonra da var qüvvəsi ilə çalışacağını bildirib.
Sonra yubilyara hədiyyələr təqdim olunub və xatirə şəkli çəkdirilib.