Noyabr ayının 5-də Azərbaycan Ağsaqqallar Şurasının İdarə Heyətinin üzvü, Əqli Mülkiyyət Agentliyinin İdarə Heyətinin sədri, professor Kamran İmanovun 75 yaşı tamam olur. Şərəf və vicdanla yaşadığı ömrünün müdriklik zirvəsində olan Kamran İmanov Azərbaycan Respublikasının Prezidenti cənab İlham Əliyev tərəfindən dövlət qulluğunda uzunmüddətli səmərəli fəaliyyətinə görə 1-ci dərəcəli “Vətənə xidmətə görə” ordeni ilə təltif edilib. Kamran müəllim hər zaman dövlət başçısı cənab İlham Əliyevin uğurlu və qətiyyətli siyasətini dəstəkləyərək ölkəmizin elmi, ictimai və sosial-iqtisadi həyatında yaxından iştirakı ilə xalqımıza böyük xidmətlər göstərib. Respublika Ağsaqqallar Şurasının İdarə Heyətinin üzvü olaraq müdrik bir ağsaqqal, dəyərli bir ziyalı kimi müstəqil Azərbaycan dövlətçiliyinin inkişafına, cəmiyyətimizin, xüsusilə də gənc nəslin vətənpərvərlik və milli adət-ənənələrə, azərbaycançılıq məfkurəsinə bağlılıq ruhunda tərbiyəsi işinə dəyərli töhfələr verib. Əminik ki, bundan sonra da Vətənimizin tərəqqisi naminə var qüvvəsi ilə çalışacaq, qarşıya qoyulan ali məqsədlərə çatmaq üçün əlindən gələni əsirgəməyəcəkdir.
Kamran müəllimi 75 illik yubileyi və 1-ci dərəcəli “Vətənə xidmətə görə” ordeni ilə təltif edilməyi münasibətilə ürəkdən təbrik edir, Ona uzun ömür, möhkəm cansağlığı, Azərbaycanımızın inkişafı naminə gördüyünüz bütün işlərdə uğurlar arzulayırıq!
Dərin hörmət və səmimiyyətlə,
Azərbaycan Ağsaqqallar Şurasının İdarə Heyətinin
üzvləri adından Şuranın sədri, millət vəkili, professor Eldar QULİYEV
