Hər zaman gənc nəslə xüsusi diqqət ayıran, onların fiziki və mənəvi sağlamlıqları, o cümlədən problemləri ilə maraqlanan və onlara dəstək olan Azərbaycan Ağsaqqallar Şurasının sədri, 28 saylı Sabunçu üçüncü seçki dairəsindən deputat seçilmiş professor Eldar Quliyev növbəti dəfə Maştağa qəsəbəsinin cüdo idman növü üzrə yüksək nailiyyət əldə etmiş uşaq və yeniyetmə idmançıları ilə görüşüb.
Görüş zamanı Eldar Quliyev vurğulayıb ki, dövlət başçısı cənab İlham Əliyev və Azərbaycan Respublikasının Birinci vitse-prezidenti Mehriban xanım Əliyeva idmanımızın inkişafına, xüsusilə də gənclərimizin sağlam böyüməsinə xüsusi diqqət və qayğı göstərir. Sevindirici haldır ki, ölkəmizdə mübariz, vətənpərvər gənc nəsil yetişir. 44 günlük Vətən müharibəsi dövründə Müzəffər Ali Baş Komandan İlham Əliyevin rəhbərliyi altında böyük şücaətlər göstərərək möhtəşəm Zəfər qazanan qəhrəman əsgər və zabitlərimiz, mərd Azərbaycan gəncləri buna bariz nümunədir. Gənc idmançılara bütün zərərli vərdişlərdən uzaq olaraq xalqımızın bu qəhrəman övladlarını özlərinə örnək almalarını tövsiyə edən Eldar Quliyev ümidvar olduğunu bildirib ki, bügünkü yeniyetmə idmançılarımız gələcəkdə daha yüksək nailiyyətlər qazanacaqlar.
Sonda o, yeniyetmə idmançılara və məşqçilərinə pul mükafatları təqdim edərək gələcək yarışlarda uğurlar diləyib, onlarla xatirə şəkli çəkdirib.
