29 iyul tarixində Balakən Rayon Ağsaqqallar Şurasının və Balakən Gənclər evinin birgə təşkilatçılığı ilə gənclərlə növbəti görüş keçirilib.
Balakən Gənclər evi sosial xidmət müəssisəsinin inzibati binasında keçirilən görüşün əvvəlində Azərbaycanın ərazi bütövlüyü uğrunda şəhid olan qəhrəman Vətən övladlarının, həmçinin hesabat dövründə vəfat etmiş ağsaqqalların xatirəsi bir dəqiqəlik sükutla yad olunduqdan sonra tədbir iştirakçılarını salamlayan Balakən Rayon Ağsaqqallar Şurasının sədri Xəlifə Mirəliyev milli-mənəvi dəyərlərimizin qızıl fondu hesab edilən ağsaqqalların Balakənin ictimai-mədəni həyatında oynadıqları əhəmiyyətli roldan, onların dəyərli öyüd-nəsihətlərinə hər bir kəsin ehtiyacının olmasından danışıb. Qeyd olunub ki, ağsaqqallar ulu öndər Heydər Əliyevin layiqli varisi Azərbaycan Respublikasının Prezidenti cənab İlham Əliyevin ətrafında sıx birləşən rayon əhalisinin, gənclərin Vətənə, dövlətə və xalqa bağlılğı istiqamətində üzərlərinə düşən vəzifələri böyük məsuliyyətlə yerinə yetirirlər.
O cümlədən sədr möhtərəm Prezidentimiz cənab İlham Əliyevin rəhbərliyi ilə müstəqil Azərbaycanın inkişafı və qüdrətlənməsi istiqamətində həyata keçirilən genişmiqyaslı tədbirlərdən, xüsusilə də ailə dəyərləri, məişət zorakılığı, narkomaniya və insan alverinə qarşı mübarizə tədbirlərində və bir sıra bu kimi məsələlərdə ağsaqqalların əhəmiyyətli rolundan, ölkəmizdə yaşlı nəslin nümayəndələrinə göstərilən yüksək dövlət qayğısından danışıb. Görüşdə çıxışçılar Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusunun 44 gün davam edən Vətən müharibəsində qazandığı tarixi qələbədən bəhs etmiş, zəfərlə başa çatan Vətən müharibəsinin dövlətçilik tariximizin ən şanlı səhifələrindən biri olduğunu vurğulamışlar.
Sonda Balakən Rayon Ağsaqqallar Şurasının sədri Xəlifə Mirəliyev ağsaqqallara göstərilən diqqət və qayğıya görə rayon təşkilatının üzvləri adından Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya təşəkkür edib.
Sonda gənclərlə xatirə şəkli çəkdirilib.
