Sumqayıt Şəhər Ağsaqqallar Şurası 7 fevral 2024-cü il tarixinə təyin olunmuş növbədənkənar prezident seçkiləri ilə əlaqədar geniş tərkibdə iclas keçirib. Tədbirdə Şəhər Ağsaqqallar Şurasının üzvləri, idarə və təşkilatların nümayəndələri ilə yanaşı, Sumqayıt Şəhər İcra Hakimiyyəti başçısının 1-ci müavini Teymur Səmədov da iştirak edib.
Əvvəlcə iclasda Vətən uğrunda canını qurban verən şəhidlərimizin əziz xatirəsi 1 dəqiqəlik sükutla yad edilib.
Sonra tədbir iştirakçılarını salamlayan Sumqayıt Şəhər Ağsaqqallar Şurasının sədri Təbrik Quliyev 7 fevral 2024-cü ildə ölkəmizdə keçiriləcək prezident seçkiləri barədə məlumat verib. Bildirib ki, Yeni Azərbaycan Partiyası cənab İlham Əliyevin namizədliyini irəli sürüb. Əlbəttə ki, artıq 20 il Azərbaycana rəhbərlik etmiş və ölkə iqtisadiyyatının inkişaf etdirilməsində, işğal olunmuş ərazilərimizin azad edilməsində və bir çox digər sahələrdə möhtərəm Prezidentimizin uğurlu fəaliyyətini danmaq olmaz. Xalq bunu görür və qiymətləndirir. O cümlədən, respublikanın bütün regionlarının, habelə Sumqayıtın inkişafı son illərdə ancaq cənab İlham Əliyevin xüsusi qayğısı nəticəsində baş vermişdir. Daha sonra Təbrik Quliyev əlavə edib ki, biz, ağsaqqallardan tələb olunan əsas məsələ seçiciləri maarifləndirilmək və onlara düzgün seçim etmələrini başa salmaqdır. Xüsusilə seçicilərin seçki məntəqələrinə kütləvi şəkildə gəlmələrinin təşkil edilməsində yaxından iştirak etməliyik.
Sumqayıt Şəhər İcra Hakimiyyəti başçısının 1-ci müavini Teymur Səmədov da öz çıxışında növbədənkənar prezident seçkilərindən ətraflı bəhs edib. Vurğulayıb ki, hazırda Azərbaycan öz tarixinin ən önəmli və qürurlu mərhələsini yaşayır. Möhtərəm Prezidentimiz, müzəffər Ali Baş Komandanımız cənab İlham Əliyevin rəhbərliyi ilə rəşadətli Ordumuz Vətən müharibəsində möhtəşəm Qələbə qazandı, ölkəmizin ərazi bütövlüyü və suverenliyi tam təmin olundu. Azərbaycan Respublikasının Prezidenti cənab İlham Əliyev qalib xalqın qalib lideridir. Bütün Azərbaycan xalqı onunla fəxr edir və bu uğurlu siyasətin davam etdirilməsini istəyir.
Daha sonra çıxış edən Sumqayıt Şəhər Ağsaqqallar Şurasının sədr müavini Əvəz Mahmudov və digər natiqlər Ulu Öndər Heydər Əliyevin layiqli davamçısı möhtərəm Prezidentimiz cənab İlham Əliyevin uğurlu daxili və xarici siyasətindən söz açıblar. Vurğulayıblar ki, hər bir vətəndaşımız kimi, ağsaqqallar da bugünkü qələbə, təhlükəsizlik, əmin-amanlıq, rifah və inkişaf yolunun davamını arzulayırlar.
