Ağalar İsrəfil oğlu Vəliyev 1957-ci il iyulun 23-də Azərbaycan Respublikasının Yevlax şəhərində anadan olmuşdur. 1963-1973-cü illərdə Yevlax şəhərinin 2 və 8 saylı məktəblərində orta təhsil almış, 1973-cü ildə Mingəçevir Politexnik Texnikumunun “Sənaye və mülki tikinti” fakultəsinə daxil olmuş və 1976-cı ildə həmin texnikumu bitirmişdir.
Ağalar Vəliyev əmək fəaliyyətinə 1976-cı il martın 26-da Yevlax Dəmir-Beton Məmulatları zavodunda III dərəcəli fəhlə kimi başlamışdır. 1976-cı ilin may ayından 1978-ci ilin may ayınadək həqiqi hərbi xidmətdə olmuşdur. Hərbi xidməti başa vurduqdan sonra Yevlax Dəmir-Beton Məmulatları zavodunda texnik-laborant, laboratoriya mühəndisi, texniki-istehsalat şöbəsinin rəisi, baş mühəndis, direktor əvəzi və direktor vəzifələrində işləmişdir.
1983-cü ildə Ağalar Vəliyev Azərbaycan İnşaat Mühəndisləri İnstitutunun “Sənaye və mülki tikinti” fakultəsinə daxil olmuş və 1989-cu ildə həmin institutu “İnşaatçı-mühəndis” ixtisası üzrə bitirmişdir.
Ağalar Vəliyev 1991-ci ildə “Azəravtoyol” İstehsalat Birliyinin Yevlax Körpütikinti Kombinatının baş direktoru vəzifəsinə, 1993-cü ildə isə Yevlax 2 saylı “Yoltəmirtikinti” trestinin rəisi vəzifəsinə təyin edilmişdir. Azərbaycan Respublikasının Prezidenti cənab Heydər Əliyevin 19 iyun 1996-cı il tarixli Sərəncamı ilə A.Vəliyev “Azəraqrartikinti” Dövlət Şirkətinin prezidenti vəzifəsinə təyin olunmuşdur.
“Tikinti kompleksinin inhisarlaşdırılması və özəlləşdirilməsi tədbirləri haqqında” Azərbaycan Respublikasının Prezidentinin 02 dekabr 1997-ci il tarixli 646 saylı Fərmanının icrasına uyğun olaraq A. Vəliyev 01 mart 1998-ci il tarixindən “Azəraqrartikinti” Dövlət Şirkətinin bazasında yaradılmış “Azəraqrartikinti” Açıq Səhmdar Cəmiyyətinin İdarə Heyətinin sədri vəzifəsinə seçilmişdir.
Ağalar Vəliyev ölkənin inşaat-tikinti sektorunda özünəməxsus yeri və böyük nüfuzu olan “Azəraqrartikinti” ASC-yə rəhbərlik etdiyi illər ərzində Bakı şəhərində və respublikanın rayonlarında yüzlərlə müxtəlif təyinatlı tikililər, binalar, qurğular inşa edilmiş, bir sıra strateji əhəmiyyətli obyektlər və avtomobil yolları istismara verilmişdir.
Bu obyektlərin bir çoxlarının açılışında Azərbaycan Respublikasının Prezidenti cənab İlham Əliyev şəxsən iştirak etmiş və görülən işləri yüksək dəyərləndirmişdir.
2010-cu ilin noyabr ayında Ağalar Vəliyev Yeni Azərbaycan Partiyasından irəli sürülən namizəd kimi 11 saylı Qaradağ Seçki Dairəsindən IV çağırış, 2015-ci ilin noyabr ayında V çağırış, 2020-ci ilin fevral ayında isə 97 saylı Goranboy-Ağdam-Tərtər Seçki Dairəsindən VI çağırış Azərbaycan Respublikası Milli Məclisinin deputatı seçilmişdir.
Hazırda Ağalar Vəliyev Milli Məclisin İqtisadi siyasət, sənaye və sahibkarlıq komitəsinin üzvü, Azərbaycan-Sloveniya parlamentlərarası əlaqələr üzrə işçi qrupunun rəhbəri, Azərbaycan-Russiya parlamentlərarası komissiyanın həmsədr müavini, TÜRK PA-da və ATƏT PA-da Azərbaycan nümayəndə heyətinin üzvü, Türkiyə, Özbəkistan, Belarus və digər ölkələrin parlamentləri ilə dostluq qruplarının üzvü, 2023-cü il noyabrın 27-dən isə Azərbaycan Ağsaqqallar Şurasının sədr müavinidir.
Ağalar Vəliyevin xidmətləri dövlət tərəfindən yüksək qiymətləndirilmiş, o Azərbaycan Respublikasının Prezidenti cənab İlham Əliyevin 09 aprel 2010-cu il tarixli Sərəncamı ilə “Əməkdar mühəndis” fəxri adına layiq görülmüş, 10 aprel 2012-ci il tarixli Sərəncamı ilə “Şöhrət”, 20 iyul 2017-ci il tarixli Sərəncamı ilə 2-ci dərəcəli “Vətənə xidmətə görə” ordenləri, 27 may 2019-cu il tarixli Sərəncamı ilə “Azərbaycan Xalq Cümhuriyyətinin 100 illiyi (1918-2018)” və 02 fevral 2024-cü il tarixli Sərəncamı ilə “Heydər Əliyevin 100 illiyi (1923-2023)” yubiley medalları ilə təltif olunmuşdur.
Evlidir, bir oğlu var.
